ᓀᐡᑲᐣᑕᑲ ᐅᐎᑕᓇᐗ
ᓂᔑᐣ ᐁᑭᐅᑕᐱᓇᒧᐗᐨ ᐅᐱᒪᑎᓯᐎᓂᐗ ᐁᑲ ᐁᐃᓯᓭᐠ ᐯᔑᑯᑕᐗᑌ ᐃᐃᒪ ᓀᐡᑲᐣᑕᑲ ᐃᐡᑯᓂᑲᓂᐠ ᐁᑭᐃᓀᑕᒧᐗᐨ ᑲᓂᑲᓂᑕᒪᑫᐗᐨ ᒋᐸᑭᑎᓇᒧᐗᐨ ᐅᑎᑭᑐᐎᓂᐗ ᐃᓯᓭᐎᓇᐣ ᐁᐊᓂᒥᓭᐗᐨ ᐁᑭᓇᐎ ᐃᓯᓭᐗᐨ ᐁᓇᑕᐌᑕᒧᐗᐨ ᒋᐎᒋᐦᐊᑲᓀᐗᐨ᙮
ᓀᐡᑲᐣᑕᑲ ᑭᐃᑭᑐᐗᐠ ᐃᓯᓭᐎᓇᐣ ᐁᐊᓂᒥᓭᐗᐨ ᒣᑾᐨ ᐊᐳᕒᐅᓬ 17, ᐯᔑᑯᑭᔑᐠ ᑲᐃᐡᑾ ᐃᓯᓭᐠ ᑲᑭᐅᑕᐱᓇᐠ ᐅᐱᒪᑎᓯᐎᐣ 19 ᐁᑕᓱ ᐊᐦᑭᐎᓀᐨ ᐅᐡᑲᑎᐢ ᐃᐃᒪ ᐃᐡᑯᓂᑲᓂᐠ᙮ ᐁᐱᐎᒋᑲᑌᐠ ᑲᑭᐅᑕᐱᓇᐠ ᐅᐱᒪᑎᓯᐎᐣ ᒣᑾᐨ ᐁᓇᐦᐃᑭᑫᐗᐨ ᑯᑕᑭᔭᐣ ᔭᐎᔭᐣ ᐁᑭᐡᑾᐱᒪᑎᓯᐨ ᐃᐃᐌ ᑎᓄᑲᐣ ᐁᑭᑐᑕᐠ ᐅᑕᓇᐠ ᑲᑭᐱᒥᑕᐗᑌᐠ᙮
“ᐊᔕ ᑭᐅᑎᑕᒥᐣ ᒋᐱᑯᓭᔭᐠ ᒥᓇ ᑎᐡᑯᓂᑲᓂᓇᐣ ᒣᑾᐨ ᑭᒋᒪᐣᓯᓭ,” ᐃᑭᑐ ᓀᐡᑲᐣᑕᑲ ᐅᓇᔓᐌᐎᓂᓂ ᕒᐆᔾ ᒧᓂᔭᐢ᙮ “ᑕᓂᔑᓂᓂᒥᓇᐣ ᐎᑫ ᐊᔦᑯᓯᐗᐠ ᐅᒥᑐᓀᒋᑲᓂᐗ ᒥᓇ ᐅᐎᔭᐎᐠ ᒣᑾᐨ ᐁᑲᑴᒥᓄᐗᒋᐦᐃᑎᐗᐨ ᐅᓄᐌᓂᐗᐣ ᐃᓯᓭᐎᓇᐣ ᑲᑭᓇᑭᐡᑲᒧᐗᒋᐣ᙮”
ᒧᓂᔭᐢ ᐅᐎᑕᐣ ᓄᑯᒥᑫ ᑲᑭᐅᑕᐱᓇᐠ ᐅᐱᒪᑎᓯᐎᐣ ᒥᐌ ᓂᐗ ᐁᐃᓯᓭᐠ ᐃᐃᒪ ᐃᐡᑯᓂᑲᓂᐠ ᓄᑯᒼ ᑲ ᐊᐦᑭᐗᐠ, ᒥᓇ ᑯᑕᑭᔭᐠ 20 ᑕᓯᐣ ᐁᑭᑯᒋᑐᐗᐨ ᒋᐅᑕᐱᓇᒧᐗᐨ ᐅᐱᒪᑎᓯᐎᓂᐗ, ᒥᓇ ᓂᓵᓯ ᐁᑯᐡᑯᐗᒋ ᐃᐡᑾᐱᒪᑎᓯᐨ ᔭᐎᔭ ᓄᑯᒼ ᑲ ᐊᐦᑭᐗᐠ᙮
ᑲᑭᐸᑭᑎᓇᒧᐗᐨ ᐅᑎᐸᒋᒧᐎᓂᐗ, ᓀᐡᑲᐣᑕᑲ ᐅᐎᑕᓇᐗ ᐃᓯᓭᐎᓇᐣ ᑲᓇᑭᐡᑲᒧᐗᐨ ᐃᐃᒪ ᐃᐡᑯᓂᑲᓂᐠ, ᐁᑕᑯᓇᒧᐗᐨ ᐅᐎᑕᒪᑫᐎᓂᐗ ᐊᐱᑕ ᑲᑕᓯᓄᐗᐨ ᐊᓂᔑᓂᓂᐗᐠ ᐁᐊᐸᒋᑐᐗᒋᐣ ᒪᐡᑭᑭᐣ, ᐃᓯᓭᐎᓇᐣ ᒥᓇ ᐱᔑᑾᒋᑐᑕᒧᐎᓇᐣ, ᐁᓄᑌᓭᑭᐣ ᒥᓇ ᔑᒪᑲᓂᔑᑫᐎᐣ ᒥᓇ ᐁᑲ ᐁᑌᐱᓇᒧᐗᐨ ᒥᑐᓀᒋᑲᐣ ᒥᓄᔭᐎᐣ ᐎᒋᐦᐃᐌᐎᓇᐣ ᒥᓇ ᒥᓂᑴᔭᐱᓀᐎᐣ ᐎᒋᐦᐃᐌᐎᓇᐣ ᒥᓇ ᒪᒥᓄᒥᐌᐎᓇᐣ᙮
ᐃᐃᐌ ᐃᐡᑯᓂᑲᐣ ᐁᑕᓯᓄᐗᐨ 421 ᐊᓂᔑᓂᓂᐗᐠ, 75% ᒥᓂᑯᐠ ᔭᐎᔭᐠ ᐅᐡᑲᑎᓯᐗᐠ, ᒥᓇ ᑲᐎᐣ ᐅᑭᑌᐱᓇᓇᐗ ᑲᒥᓈᑲᒥᐠ ᓂᐱ᙮ ᒥᓇ ᒣᑾᐨ ᐅᓇᑭᐡᑲᓇᐗ ᐁᐃᔑᓂᑲᑕᐠ ᒧᓂᔭᐢ “ᐁᑭᒋᐊᓄᑭᒋᑫᒪᑲᑭᐣ” ᒋᓇᑯᒋᑲᑌᑭᐣ ᑲᐃᔑ ᓇᑕᐌᑕᒧᐗᐨ ᓄᑕᓯᓂᑫᐎᓂᓂᐗᐠ ᒥᓇ ᐅᐣᑌᕒᐃᔪ ᐅᑭᒪᐎᐣ ᐃᐃᐌᓂ ᐅᐣᒋ ᑲᐗᑲᑌᐠ ᐃᐡᑯᑌ᙮
ᒧᓂᔭᐢ ᐃᑭᑐ ᐃᐃᐌ ᐃᐡᑯᓂᑲᐣ ᑲᑴᑌᐗᐠ ᑲᑭᓇ ᐅᑭᒪᐎᓇᐣ, ᐊᑯᓯᐎ ᐱᒥᐎᒋᑫᐎᓇᐣ, ᑎᐸᑯᓂᑫᐎ ᐱᒥᐎᒋᑫᐎᓇᐣ ᒥᓇ ᔓᓂᔭᐎ ᐎᒋᐦᐃᐌᐎᓇᐣ ᐱᒥᐎᒋᑫᐎᐣ ᒋᐎᒋᐦᐊᐗᐨ ᓀᐡᑲᐣᑕᑲ ᒣᑾᐨ ᐁᐊᓂᒥᓭᐗᐨ᙮
“ᑲᐎᐣ ᑫᑯᐣ ᑕᔭᓯᒥᐣ ᑫᑭᐅᒋ ᐎᒋᐦᐊᑲᓀᐨ ᔭᐎᔭ, ᒥᓇ ᐊᐗᔑᒣ ᐅᑕᓂ ᐅᑕᐱᓇᓇᐗ ᐅᐱᒪᑎᓯᐎᓂᐗ ᐅᐡᑲᑎᓴᐠ,” ᒧᓂᔭᐢ ᐃᑭᑐ᙮ “ᑲᐎᐣ ᐅᐅᐌ ᒥᓈᔑᓯᓄᐣ ᒥᓇ ᑕᑭᐊᐣᒋ ᑲᓇᐗᐸᒋᑲᑌᐸᐣ ᐃᓯᓭᐎᓇᐣ᙮”
“ᐎᑫ ᑕᓂᒥᑯᐡᑲᑌᑕᒥᐣ ᒥᓇ ᑕᓂᐅᒋ ᐊᓂᒣᑕᒥᐣ ᑲᐃᓯᓭᐗᐨ ᑐᐡᑲᑎᓯᒥᓇᐣ ᒥᓇ ᑲᑭᓇ ᐊᓂᔑᓂᓂᐗᐠ ᐊᐊᐌ ᒪᐡᑭᑭᐎ ᐅᑭᒪᐎᐣ ᐁᑲ ᐁᐃᓯᓭᓂᐠ ᒋᐎᒋᐦᐃᑯᔭᐠ ᒋᑭᐅᑕᒋᑲᑌᐠ ᔓᓂᔭ ᒋᑭᐊᓄᑭᒋᑲᑌᑭᐣ ᒥᓇ ᒋᓇᑲᐡᑭᑲᑌᐠ ᐅᓄᐌᓂᐗᐠ ᒪᓯᓭᐎᓇᐣ ᐁᑲ ᒋᑭ ᐃᓯᓭᑭᐸᐣ᙮” ᒧᓂᔭᐢ ᐃᑭᑐ᙮
ᐃᐃᒪ ᐱᐗᐱᑯᐠ ᐁᑭᐱᒪᓯᓇᐦᐃᑫᐨ, ᒪᐡᑭᑭᐎ ᐅᑭᐗᐎᐣ ᐊᓄᑭᓇᑲᐣ ᑭᐱᑭᑐ ᐅᑭᒪᐎᐣ ᐊᔕ ᐅᑭᐊᔭᒥᐦᐊᐣ ᐃᐡᑯᓂᑲᓂᐠ ᒥᓇ ᐯᔓᐨ ᐅᑲᐎᑕᓄᑭᒪᐗᐣ ᒋᓇᑲᒋᒋᑲᑌᐠ ᐊᓂᔑᓂᓂᐗᐠ ᒋᑌᐱᓇᒧᐗᐨ ᐎᒋᐦᐃᐌᐎᓇᐣ ᑲᓇᑕᐌᑕᒧᐗᐨ᙮
ᐎᓬᐃᔭᒼ ᐌᓬᐢ, ᑎᐸᒋᒧᐎᐣ ᐊᓄᑭᓇᑲᐣ ᐃᐃᒪ ᒪᐡᑭᑭᐎ ᐅᑭᒪᐎᐣ, ᑭᐃᑭᑐ ᐅᑭᒪᐎᐣ ᐅᑭᐱᐎᑕᓄᑭᒪᐗᐣ ᓂᔑᓇᐯ ᐊᐢᑭ ᐎᒋᐦᐃᐌᐎᓇᐣ ᑲᐎᒋᑐᐗᐨ ᒋᑭᐱᔕᐗᐨ ᓂᔑᐣ ᑲᐃᓇᑭᓱᐗᐨ ᒋᐊᔭᒥᐦᐊᐗᐨ ᔭᐎᔭᐣ ᐃᐃᒪ ᐃᐡᑯᓂᑲᓂᐠ᙮ ᒋᓇᑭᓇᑲᓀᐗᐨ ᒥᓇ ᒪᐡᑭᑭᐤᑴᐠ ᑕᐃᔑᓂᔕᐦᐊᐗᐠ ᐃᐃᒪ ᐃᐡᑯᓂᑲᓂᐠ, ᐌᓬᐢ ᐃᑭᑐ, ᒥᓇ ᒋᓇᑭᓂᑲᑌᐠ ᐃᐡᑯᓂᑲᓂᐠ ᐎᒋᐦᐃᐌᐎᐣ ᑲ ᐊᔭᒥᐦᐊᑲᓀᐨ ᐱᒥᐎᒋᑫᐎᐣ ᓄᑎᐣ ᐊᐗᔑᐡ ᒥᓇ ᑎᐯᒋᑫᐎᓇᐣ ᐱᒥᐎᒋᑫᐎᐣ ᒋᑐᑕᒧᐗᐨ᙮
ᐌᓬᐢ ᒥᓇ ᐅᑭᐎᑕᐣ ᑲᑭᐸᑭᑎᓇᑲᓀᐨ ᐅᐡᑭ ᔓᓂᔭ ᐃᐃᒪ ᐅᑭᒪᐎᐣ ᔓᓂᔭᐎ ᑎᐸᑭᒋᑫᐎᐣ ᐁᑭᑕᑯᓇᑲᓀᐨ $4 ᒥᓬᐃᔭᐣ ᒥᓂᑯ ᓂᔓᐊᐦᑭ ᒋᓇᑭᓇᑲᓀᐗᐨ ᒥᑐᓀᒋᑲᐣ ᐊᑯᓯᐎᐣ ᐎᒋᐦᐃᐌᐎᐣ ᐊᓄᑭᓇᑲᓇᐠ ᒥᓇ ᑲᐃᓇᑲᓀᔭᑭᐣ ᐎᒋᐦᐃᐌᐎᓇᐣ ᒋᔑᐸᑭᑎᓂᑲᑌᑭᐣ ᐃᐃᒪ ᐊᓂᔑᓂᓂᐤ ᐃᐡᑯᓂᑲᓇᐣ᙮
ᔕᑯᐨ ᒧᓂᔭᐢ ᐅᑭᐎᑕᐣ ᐃᐃᒪ ᓀᐡᑲᐣᑕᑲ ᑲᓇᑕᐌᑕᒧᐗᐨ ᐁᑲ ᐊᑯᓯᐎ ᐎᒋᐦᐃᐌᐎᓇᐣ ᒥᓇ ᑲ ᐊᔭᒥᐦᐃᐌᐗᐨ ᐊᓄᑭᓇᑲᐣᐠ᙮ ᑭᐃᑭᑐ ᐃᐃᒪ ᐃᐡᑯᓂᑲᓂᐠ ᐎᐸᐨ ᐁᓇᑕᐌᑕᒧᐗᐨ ᔓᓂᔭᐎ ᐎᒋᐦᐃᐌᐎᐣ ᒋᑭᑌᐱᓇᐗᐨ ᐊᓄᑭᐎᓇᐣ ᑎᓄᑲᐣ ᔑᒪᑲᓂᔑᑫᐎᐣ, ᒥᓇ ᐎᒋᐦᐃᐌᐎᓇᐣ
ᒋᑌᐱᓂᑲᑌᑭᐣ ᒥᒋᒪᐣ, ᑲᒥᓈᑲᒥᐠ ᓂᐱ, ᑲᐯᔑᐎᓇᐣ ᒥᓇ ᐱᒥᔭᐎᓇᐣ ᒋᐅᒋ ᐎᒋᒋᑲᑌᐠ ᑲᐱᔕᐗᐨ ᔭᐎᔭᐠ ᑲᐱᐎᒋᑐᐗᐨ ᐊᓄᑭᓇᑲᓇᐠ ᐃᐃᒪ ᐃᐡᑯᓂᑲᓂᐠ᙮